Wii xeen, kël, wën mer unser familye fersamle khan an te Waynachts tsayt!
Ich hon yets kraat ti liste kekukt woo yeete kexwister mit nëme sol fer tas Waynachts Fest fon mayn familye. Un samer kerechent, kept tas en xeene panket, mit fiil kuut ese, ketrënk un mee wii traysich persoone paysamer fer ti eenichkheet fayre, te liipe in te familye un an Yeesus Khint traan tënke torich en kleen mensaaj fol petaytung woo een fon te meet runer leese tuut foer em nachts ese.
Familye is tas plats woo mer unser aanfang phunkt hon fon liipe, rexpekt, mënxliche weyerte, liipe tsum aarwat… tesweche is Yeesus aach in en familye uf ti welt khom: fer uns se tsayche te kroose weyert woo unser familye hot!
Un, xpeter hiin, ore iwer tas kanse leewe lang, lërnt mer in te familye anere weyerte woo mer wise mus fer sich mit te layt unerhale, in te froyntxafte, in te aarwat, in te kexefte, in te kemaynte un in te keselxaft… wii eerlichkheet un fiile anere kwaliteete.
Wayl, tas leewe is wii en xpiichel un tuut uns lërne:
-Tas ti layt liiplich sin, wën ich liiplich mit tëne sin;
– Traurich sin, wën ich traurich sin;
– Xlecht sin, wën ich aach xlecht mit tëne sin;
– Mich rexpekteere tuun, wën ich rexpekt mit tëne hon;
An yeete Waynachte ore ën fom yoer, khan ich mich renoweere, mayn weyerte uf ti woo tuun un wiye, kuke op ich mich ferpesert hon, was ich kuutes ketuun hon fer te anere un fer ti mënxheet.
Meyer al khëne rexpekt hon, eerlichkheet, en hooch skala fon weyerte un ti kaystliche kwaliteete woo ti echt raychtum sin fon yeete mënx. Meyer sin too, uf tëm planet, fer uns se ferpesere, un tas Yeesus Khint khomt yeetes yoer noch mool fer uns too traan tënke mache.
Xeene kruus aus Thee Walt.
*Solange Hamester Johann ist die Leiterin vom Proyëkt Hunsrik in Thee Walt, Santa Maria do Herval, RS, Kommentatorin der Radiosendung AHAI – Die Deutsche Stunde der Gemeinden – Block 04 und Kolumnistin bei www.brasilalemanha.com.br. E-Mail: equipehunsrik@gmail.com