Tee taach kept kefayert yeetes yoer am 21 yanuar.
Tee taach sol rexpekt, tolerans un tialook tswixe ale ferxiitne Relichioone in te Welt fortere, tii woo als prinsip ti kuutheet aan saan.
Ti itee is en friitlich koeksistëns tswixe ale ferxiitne relichioosixe un toktriine iteolojiie uf muntere, tas ti mënxheet ti relichioos intolerans neewe lose khan. Relichioose theeme waare kans oft te motiif fer ti xlimste kriiche un konflikte woo ti mënxheet xon kesiin hat.
Am selwiche taach wërt hier im Brasil kefayert te Natsionaale Taach keeche relichioos intolerans, tas en xtërkung foer kexlaa kept fer te opjektiif fon tëm Welt Relichioons Taach.
Tëm noo ti kepoot fom Welt Relichioons Taach, ekaal op ti relichioon monoteiismus (woo an en eensichste Kot klaawe) ore polyteiismus (woo an fiile kote un entiteete klaawe), neekst al suuche te selwiche opjektiif: tas friite un rexpekt unich te mënxe un ti natuer kefortert kept.
Brasil kept oft aan kesaat als ti natsioon woo ale mënxe un ale relichioone uf nëme tuut. Wii kuut tas meyer als en friitliche payxpiil fer ti welt khëne sin.
Wole meyer hëlfe tas tas imer peser kept¿ Meyer khëne, kans sicher, unser hërts un unser sin imer mee uf mache, tas ti mënxe sich imer mee fereeniche, wayl kraat tesweche sin meyer uf tee welt.
Xeene kruus aus Thee Walt.
*Solange Hamester Johann ist die Leiterin vom Proyëkt Hunsrik in Thee Walt, Santa Maria do Herval, RS, Kommentatorin der Radiosendung AHAI – Die Deutsche Stunde der Gemeinden – Block 04 und Kolumnistin bei www.brasilalemanha.com.br. E-Mail: equipehunsrik@gmail.com