Solange Hamester Johann
Radiosendung AHAI Nr. 1011 – Koimmentar in Hunsrik (= Brasilien-Hunsrückisch)
Haloo, hier is Solange Hamester Johann, fom Proyëkt Hunsrik (= Brasilien-Hunsrückisch).
Mach mich traan tënke an en tsayt woo noch khee Pëls Nikel waar!
Eriner tich, Yeesus, “Khint sin in uns”, an yeete Waynachte!
Eriner mich an friirixe tsayte, woos tuu noch khee wayse paat hast, host tich noch nët mit root tsaych aan ketsoo kehat, wii tuu noch nët ferxtëlt këp pixt als en xarmant alt mënche, woo simuliert kexënke hët fer yeete ëne.
Eriner tich fer imer soo uf ti wëlt khome, nakich un keweenlich, in te ferkëstne seele, tort woo ales feelt un en krislich khëlt trin woont…
Eriner tich fer imer ti Trompëte fom Klaawe foer tich aan xike, fer tii woo ferkës hon tas es
Hofnung këpt.
Eriner mich an te tsayte woos tuu mich fom kripche aan kekukt host, mit tayn kroose un siise aue, wii ich tas aayer proot mit tsuker am ëse waar, woo mayn muti kepakt hat! Eriner tich imer ti mënxe aan kuke mit tëne aue, tii woo ferkës hon tas es
Hunger uf te wëlt këpt…
Eriner tich an en tsayt woo tas eensichste licht woo unser haysye pelaycht hot en kleen khëtsye waar, awer mit xtrame klaawe aan kextoch… un Tuu host temit kans keklënst, im mite fon unsere haym, mee wii ti kanse xtërne mitsamer… Eriner tich noch soo klënse, fer ti seele erinere tas es
Tunkelheet këpt…
Eriner mich an en tsayt woos tuu sëlëpxt uns phaar kleene kexënkcher keprung hoxt. (Kleene kexënkcher, wayls tuu kleen waast, khonst nët kroos tings traan.)
Eriner tich imer soo kleen runer khome, in ti kayste woo ferkës hon tas es
Xwiirichkheete këpt!
*Solange Hamester Johann ist die Leiterin vom Proyëkt Hunsrik in Thee Walt, Santa Maria do Herval, RS, Kommentatorin der Radiosendung AHAI und Kolumnistin bei www.brasilalemanha.com.br. E-Mail: equipehunsrik@gmail.com.