Yeete plats ore xtat woo kekrint kep waar fon unser folek, fint en xeener eerungs aart fer sayn tankpaarkheet tsayche fer sayn layt un nookhomer fon tëne korajoose foerfaarer.
Yeete familye hot soo en lang, soo important, soo interesant kexicht tas en puch khënt kexrip kewe iwer ti xwiirichkheete fon yeete pikaat, yeete mënx un sayne familye ore kemaynte krupe.
Fiil is ach xon kexrip kep. Hunerte picher iwich ti Inwanerungs Kexichte sin xon puplitseyert kep in te siit xtaate fom Brasil. Tas is kans important tas niks ferkes keet un aach tas yeete persoon sayn aychne kexichte fine khan.
Soo xeen is tas, tas hayt tsuu taach, fiile layt sich mee un mee intereseere fer ti kexichte fon sayn foerkhomer khëne lërne, fer wayter fertseele ore xraywe un noch pekhant mache in te Familye Feste, woo imer mee am paseere sin.
Ich klaawe tas tas resultaat is fon te important kulturaal erepxaft woo unser inwanerer ore foerkhomer uns kelos hon. Ti eltre eere is en flicht, awer yeete ëne sayn kexichte khëne lërne is en form fon liipe un rexpekt iwich tëne iire aarwat, tëne iire soriche an sayn mënxliche weyerte wayter lërne fer sayn khiner un nookhomer.
Tas siit mer kans klaar an te kemaynte – mit xuul, kapel un khërich hoof woo te aanfangs marke is fon fiile fon unser pikaate un xtet un aach ti fiile ferayne woo se kekrint hon un woo pis hayt pexteen un pis hayt aarwat pringe torich turismus un anere sorte xtele, un uns xtols mache mit ales kuutes woo meyer keerept hon fon unser liipe eltre.
Xeene kruus aus Thee Walt – Santa Maria do Herval, RS.
*Solange Hamester Johann ist die Leiterin vom Proyëkt Hunsrik in Thee Walt, Santa Maria do Herval, RS, Kommentatorin der Radiosendung AHAI – Die Deutsche Stunde der Gemeinden – Block 04 und Kolumnistin bei www.brasilalemanha.com.br. E-Mail: equipehunsrik@gmail.com