Mit 6 yoer, muste ale puupcher in ti xuul keen fer lërne . In Yutaa hot es khee xuul kep, tesweche hon sayn ëltre tëm kelërnt leese un xraywe un noch anere khëntnise.
Is umkeprung kep mit 29 yoer, im yoerkang 27 noo Kristus (27 dC).
Wii eyer 14 yoer alt waar, hon sayn ëltre em noo Qumran kexikt, woo ticht am Toote Meer playpt, woo en aart klooster waar. Too is Yohan en nazarite kewayt kep, un hot ferxproch teet khee rauxente ketrënke trinke, ti hoer wakse lose un net an toote faare.
Ti Piipel saat (Mt 3,4) tas Yohan sich kans eenfach keklayt hot, mit khameele haut un en leter këtel. Sayn ese waar “haayxreke un wilte hoonich“. Tas kriichixe wort als “haayxreke” iwersetst khan se tuun hon mit te frucht fom Yohanis Proot Paam anxtat haayxreke insekte. Tas is meechlich wayl tas hepreyxe wort fer haayxreke is“hagavim“ un fer Yohanis Proot Paam (ore Alfarooba) is “haruvim“ un sin aarich eenlich.
Te Yohanis Proot Paam- Ceratonia siliqua is fon te rechioon fom Metiteraneo Meer, tswixe 10 un 20m hooch un sayn espaare fruchte sin siis, aach pekhant als Leep khuuche fon Skt-Yohan, Pythagoras-Fayche un Fayche-fom-Egypt. Tiine als xokolaate penutsung.
In te xoote sin 10 pis16 soomcher mit praun farep, ti kilat, woo fon te hantler ore kexefts mëner fon te Friirixe Tsayte penutst kep waare weche sayn keringe kewicht un klaychformichkheet, fer te kewicht un te weyert kewe fer tings woo mit kolt ore raare xteen kemach kep waare – too heyer tas wort “kilat”.
In te xpeet reemix tsayt, hot te nikel aus phuure kolt pekhant als Solidus, 24 karat ore kilat soome kewoo = etwa 4,5 kram. Als resultaat, is te kilat aach en raynheets mesung fer kolt. Soo: 24 kilat kolt = 100% rayn, 12 kilat kolt = ti lekiirung hot 50% kolt. Tee systeem hot sich stantartisiert un en kilat is mit 0,2 Gramm = kewicht fon 1 soom.
Xeen, kël, wën mer ti friirixe kexichte khëne lërne khan…
Xeene kruus aus Thee Walt.
*Solange Hamester Johann ist die Leiterin vom Proyëkt Hunsrik in Thee Walt, Santa Maria do Herval, RS, Kommentatorin der Radiosendung AHAI – Die Deutsche Stunde der Gemeinden – Block 04 und Kolumnistin bei www.brasilalemanha.com.br. E-Mail: equipehunsrik@gmail.com